Puipui oe lava mai femalagaiga taufaasese

Afai o e fuafua e talosaga se visa e te ulufale mai ai i Niu Sila, ia e nofouta i tagata e taumafai e faasese oe i auala e gaoia ai au tupe po o le taumafai e fai sau lesitala mo galuega e fesiligia le moni o folafolaga o ta‘ua ai.

Tagai i faamatalaga o tusia i lalo e siaki ai ma auala e te faia e puipuia ai oe lava mai faiga taufaasese po o visa taufaavalea.

Afai o e faigaluega i le taimi nei i Niu Sila, ma o e masalomia i le fai faatautala o oe, aua e te palaai e te talanoa i se sui a le Immigration New Zealand (INZ). Matou te galulue faatasi ma le Employment New Zealand i auala e mafai ona fesoasoani atu ai, ma saunia se faiga e tali atu ai pe a moomia.

Vaavaai mo foliga e te iloa ai faiga taufaasese

A e vaaia foliga e te iloa ai faiga taufaasese, tuu loa ma faaeteete lelei. Fesili muamua ma saili se fautuaga aloaia. E mafai ona e faafesootai mai tatou te faatalanoa tulaga o e popole ai. 

Ua talosagaina oe e te totogia lau galuega

Vaavaai lelei mo tulaga ua manao ai e te totogia se tupe mo lau galuega, e masani na faaupu o tupe e faagaioia pe taofi ai le galuega o le ‘processing’ po o ‘placement’ fees.

E lē mafai e pule o galuega i Niu Sila ona faaee atu se tupe e te totogia mo se galuega po o le faamalosia o oe e totogi tupe alu mo le faagaioia o auala e faafaigaluega ai oe. E aofia ai isi faalapotopotoga po o tagata ua faamalosia lou totogia o se tupe.

Afai e auala atu lau talosaga:

• i se faalapotopotga o tau sailia tagata faigaluega, faaeteee i tulaga e faaee sa‘o atu ai ia te oe se tau maualuga e te totogia. E tatau na talafeagai le tau faaee atu mai se faalapotopotoga e sailia tagata faigaluega ma galuega na latou faia mo oe.
• i se sui faufautua tau femalagaiga, e tatau na e totogia se tupe e sa‘o lelei ma galuega na latou faatinoa.

Pau le tupe e te totogia na faaee atu e le Immigration New Zealand o le totogi mo le talosaga na fai. E ono iai tupe e totogi mo le sailia o faamaoniga mo lau talosaga, e pei o le faia o se pepa ma’i.

Faamuamua lau talosaga ma le maua o se sui o le ofisa o femalagaiga

O ituaiga faiga taufaasese nei, e mafai ai e se faufautua, sooupu, po o se isi tagata ona folafola atu e i ai tagata faigaluega e masani ai e vave maua atu ai se tali.

E lē moomia lou faaaogaina o se faufautua. Manatua lelei tulaga nei mai le Immigration New Zealand:

• e leai ma se tulaga o le a faamuamua ai lau talosaga e le ofisa tusa lava pe na e faaaoga se faufautua, ma
• e faatoa faia se faaiuga o se talosaga pe a uma ona iloilo faamatalaga e tusa ma tulafono tau femalagaiga.

Faamuamua lau talosaga ma le maua o se sui o le ofisa o femalagaiga

O faiga taufaasese nei, e faamalau atu e le tagata o fautuaina oe, o se sooupu, faufautua po o se isi tagata faapea e malamalama i le faatinoga o galuega po o le iai o se sui o le ofisa o femalagaiga e masani ai e mafai ai ona faamuamua lau talosaga.

E lē moomia lou faaaogaina o se faufautua.

E lē faapea ai o le a faamuamua e le Immigration New Zealand lau talosaga. Pau lava le matafaioi a faufautua o le fesoasoani ia e iloa lelei le faiga e fai ai mataupu tau femalagaiga.

Ua fautuaina oe e te faia se faamatalaga pepelo

E lē tusa ai ma le tulafono tulaga e pelogia ai le ofisa ona o le taumafai e maua se galuega po o se visa.

O le faia o tulaga faapenei i luga o se fautuaga a lē ua fai ma faufautua po o se isi o avea ma ou sui, o lona uiga ua solia le tulafono. O foliga na e te iloa ai e ono solia isi tulafono tau femalagaiga po o tulafono tau galuega.

E taua lou tuuina mai o faamatalaga moni. O lou faia o soo se faamatalaga sese e ono afaina ai lau talosaga ua uma na fai ma isi talosaga mo se visa o fia maua.

Ua fai atu e lē tutusa au aiatatau ma aiatatau o faatulagana maualalo tau galuega e maua e Tagatanuu Niu Sila

E lē moni lea faamatalaga. E tutusa aiatatau o faatulagana maualalo tau galuega o tagata uma i Niu Sila, e aofia ai tagata fai mai. E aofia ai aiatatau e maua ai totogi mo aso malolo ma aso ma‘i, ma aiatatau e faia ai se faaseā ona o faaletonu o nofoaga o faatino ai galuega.

O tagata e fai atu o tulaga nei e te lē agavaa ai, ua latou solia tulafono tau femalagaiga po o tulafono tau galuega.

Ua ofoina atu se taui lelei e maua ai se apitaga e nofo ai

E lē masani ai le maua o se apitaga e nofo ai e auala atu i le galuega o le a faafaigaluega ai oe i Niu Sila.

Na o tulaga, e pei o galuega fai faatoaga po o se faalapotopotoga e saunia apitaga, e fetaui ai tulaga faapenei.

Nofouta lelei i taui lelei e ofoina atu e faaupu o se ‘package’ e avatu faatasi ma se visa, galuega ma se apitaga – e taumafai tagata taufaasese e faaee atu se tau maualuga tele e te totogia mo se apitaga e nofo ai.

Ua folafola atu e mafai ona e maua o se pepa nofomau

E maua i Niu Sila avanoa lelei mo aoaoga ma galuega. E mafai ona e faaaoga avanoa lelei i luga o se visa faavaitaimi, ae e lē faapea o le a mautinoa ai lou nofomau ai i le atunuu.

O le masani ai a tagata taufaasese le folafola o tulaga e ono maua ai pepa nofomau, ma ia e nofouta lelei auā e faalagolago le maua o pepa nofomau i nisi o agavaa faapitoa, tomai masani, faailoga ma tusi pasi po o galuega.

Folafola le maua o tupe maua, se fale faatau, po o se fesoasoani a le malo

E tatau ona e faia se tonu mautinoa i luga o tulaga ua ofoina atu, ae lē o ni folafolaga e ono lē mafai ona faataunuuina.

E tusa ma tulafono masani, e lē mafai ona e faatauina mai se fale po o le maua o se fesoasoani tupe mai le malo se‘i vagana ua e umia se visa nofomau. E lē mafai ona e galue i se isi galuega mo le fia faaopoopo o tupe maua.

Ua fai atu e tatau ona e faaaoga se faufautua

E lē moomia lou faaaogaina o se faufautua e fai ai se talosaga mo se visa. E mafai ona e talosaga mo se visa e aunoa ma se isi e fesoasoani atu e faaaoga ai faamatalaga ua matou saunia i luga o le upegatafailagi.

Afai e tau auala mai se faufautua, ia e iloa lelei na o faufautua ua faamauina e ta‘ua o licensed immigration adviser (LIA), se loia Niu Sila ua faamaonia, po o se isi tagata ua faatulafonoina e mafai ona fautuaina oe i tulaga tau femalagaiga. E mafai ona e faaaoga se LIA e fetaui ma lau gagana tautala, nofoaga o e nofo ai ma lau tala o le tupe.

E te lē o maua se tala lata mai o lau talosaga na fai

Afai e lē o maua atu mai le faufautua po o se isi o avea ma ou sui se lipoti lata mai o lau talosaga na fai, tagai i la matou upegatafailagi e te iloa ai le umi e faagasolo ai talosaga.

Afai o e popole ona e te lē o maua faamatalaga nei, e mafai ona e faafesootai sa‘o mai i matou e faamaonia lau talosaga.

Auala e puipuia ai oe lava mai faiga taufaasese

• E lē moomia lou faaaogaina o se faufautua. Afai e tau auala mai se faufautua, ia e iloa lelei na o faufautua ua faamauina e ta‘ua o licensed immigration adviser, se loia Niu Sila ua faamaonia, po o se isi tagata ua faatulafonoina e mafai ona fautuaina oe i tulaga tau femalagaiga.

• Afai e te manao e faaaoga se faufautua po o se faalapotopotoga e sailia tagata faigaluega, e lelei le faatusatusa o tau e totogi, e te iloa ai le sa‘o o tupe e te totogia mo galuega ua latou saunia.

• Faamaonia pe ua iai se faamaoniga aloaia o le pule o le galuega e te ono maua ai se galuega. E tatau ona iai muamua se faamaoniga aloaia o pule o galuega uma o lo o faafaigaluegaina tagata i luga o Accredited Employer Work Visa. Faamaonia pe faamata latou te faaaogaina le metotia faainitaneti ua saunia e la matou ofisa.

• Talanoa sa‘o i le pule e ono maua atu ai sau galuega, e pei o le taimi e faia ai se faatalatalanoaga o le galuega. E lē o se suiga laitiiti le siitia i se isi atunuu, ma e lelei lou ta‘u sa‘o o tulaga o lou agavaa ma le onomea ai i se galuega.

• Faafesootai mai, pe afai e iai se mea e te lē o mautinoa. E mafai ona matou fesoasoani atu e faamalamalama ituaiga visa ma tulaga o le moni o faamatalaga na e faailoa i se isi tagata. E mafai ona matou faailoa atu faamatalaga o tulaga ua oo i ai lau talosaga. E mafai na fesootai oe i se faamatalaupu, pe afai e lē o lau gagana tautala le Gagana Peretania.

• Ae afai e mafai ai, na e suesue atili lea ma isi tagata i lou atunuu na uia avanoa faapenei na ulufale mai ai i Niu Sila.

• Afai e saunia e lou pule o le galuega se apitaga e te nofo ai, fesili i ai mo ata e te iloa ai foliga o le fale ma tagai i le upegatafailagi a le Tenancy Services e faatusatusa ai tupe totogi o fale mautotogi mo ituaiga fale i le nofoaga e te faigaluega ai ma faitau i au aiatatau o oe o se tagata nofo mautotogi.

• Ia e malamalama atoatoa i le soifuaga i Niu Sila, e aofia ai tau o le soifuaga ma le maua o tausiga faalesoifua maloloina. E te maua i le upegatafailagi Live and Work isi faamatalaga aogā.

• Malamalama i au aiatatau tau galuega i lou tulaga o se tagata faigaluega Niu Sila. E maua i le upegatafailagi Employment New Zealand faamatalaga aogā i gagana eseese, ma lesona e fai fua e te iloa ai tulaga maualalo o aiatatau, matafaioi ma auala e foia ai faafitauli tau galuega.